Nagtapos na ang panunuyo ng drama prince na si Gerald Anderson kay Popstar Princess Sarah Geronimo na nagsimula noong Pebrero.
Hindi man diretsahang kinumpirma, ang madamdaming pag-uusap nina Sarah at ng kanyang mga magulang na sina Daddy Delfin at Mommy Divine ang tila nagbigay-linaw sa pagtatapos ng espesyal na pagtitinginan ng dalawa.
Sa pinakahuling episode ng “Sarah G Live” kagabi, pinasinungalingan ng Popstar Princess na ang kanyang ina umano ang nagpatigil kay Gerald na manligaw kay Sarah.
“Sa totoo po talaga, hindi po si Mommy ang nagpatigil kay Gerald na manligaw talaga. Hindi si Mommy,” ani Sarah.
Dinepensahan din Mommy Divine ang kanyang sarili sa naturang isyu.
“Actually kami nga ni Daddy [Delfin] ang nagbigay ng permiso sa kanya para ligawan siya [Sarah] sa bahay. Kinausap talaga namin siya nang pormal na sabi ko sa bahay lang pwedeng ligawan ang anak ko, hindi sa labas, ‘di lang sa text,” sabi ni Mommy Divine.
Ayon kay Mommy Divine, nais lamang nilang mag-asawa na sa bahay ligawan ang kanilang dalaga bilang pagrespeto rito.
“Nirerespeto namin kayo pero respetuhin mo rin kami. Kasi babae ang anak ko,” dagdag ni Mommy Divine.
Muntik nang magmadali
Sa pagpapatuloy ng programa, sinabi ni Mommy Divine sa kanyang anak na huwag sana nitong ikasama ang paghihigpit na ginagawa nilang mag-asawa.
Nais lang aniya niyang protektahan ang anak at tanging kabutihan lang ang nais niya para sa singer-actress.
“Kahit anong mangyari, magtampo man kayo, magalit minsan sa akin. Pero magiging firm ako sa stand ko kung ano ang tama para sa inyo. Lagi kong ilalaban yun para maprotektahan ko ang kapakanan ninyo at para hindi kayo mapahamak at mabigyan kayo ng magandang kinabukasan.”
“Para maipagmalaki kayo ng kahit sino kahit na saan kayo magpunta. Kung sino man ang maswerte para sa ‘yo na magiging maswerte rin sa ‘yo dahil pinag-ingatan ka namin.”
“Darating din ‘yon anak. ‘Wag kang mag-alala ibibigay rin ng Diyos yun sayo,” sabi ni Mommy Divine sa kanyang anak.
Sinagot naman ito ni Sarah ng: “Oo nga, di naman ako nagmamadali, muntik lang…”
Matapos nito ay naiyak na ang Popstar Princess at napayakap sa ina.
Matatandaang napabalita noong isang linggo na nagtapos na umano ang espesyal na pagtitinginan nina Sarah at Gerald dahil sa di pagpabor ng mga magulang ng Popstar Princess.
Una nang inamin ng dalaga na nagde-date sila ni Gerald noong mga nakaraang buwan. Naging malapit ang dalawa nang naging magkapareha sa pelikulang “Catch Me…I’m in Love.”